“Gijón Fabril nun se pieslla”, ye la frase d’esti mes.
Ta na cai, nos cartelos, pegatines y pintaes y nes mentes de munches asturianes preocupaes pol futuru de les suyes y pol d’elles mesmes. ¿Y cómo nun vamos tar preocupaes?
L’alministrador concursal vese sorprendíu al ver que la fábrica na que tien de certificar el pieslle furrula perfectamente ensin falta de director, que yá garró les maletes pa nun volver a Asturies (si ye que dalguna vez lo tuviere), asegurando, eso sí, que marcha cola producción del so principal sociu en Fabril Gijón, Verallia, de quienes recibe la principal carga de trabayu y a quienes al mesmu tiempu paga l’alquiler polos terrenos de la fábrica.
Casi 50 trabayadores mantienen col so trabayu la fábrica, sólo necesiten trabayu que facer, que la fábrica de Verallia asitiada n’Avilés-yos encargue la obra. ¿Pa qué val el gobiernu d’Asturies? Dan subvenciones y facilidaes a los empresarios pa venir y instalase n’Asturies, ¿y cuando marchen, quien sofita y da facilidaes a les trabayadores? Hai quien pide la mediación del gobiernu pa traer otru empresariu interesáu na fábrica, ¿pa volver a tar asina cuando-y dexe d’interesar la producción asturiana?
Yá valió de pidir migayes, queremos el nuestru pan. Nun queremos siguir sumando mes a mes consignes nueves. Que “Gijón Fabril nun se pieslla” ponga’l puntu y aparte a les reivindicaciones de les trabayadores de seguridá nel Hospital San Agustín, de les trabayadores d’El Árbol, del Mataderu Central d’Asturies, d’Imasa-Modultec y de tantes otres, poner fin a la resistencia y sentar les bases de la victoria.
Desiximos la mediación del Gobiernu d’Asturies, reclamamos a la Xunta Xeneral la única verdadera ayuda a les trabayadores de Gijón Fabril:
– Desixir a Verallia l’encargu de trabayu a la planta xixonesa.
– Compra de la maquinaria y cesión a l’asamblea de trabayadores de Gijón Fabril.
Desiximos el sofitu real a quienes lu necesiten, a quienes sufren la progresiva desindustrialización d’Asturies, necesitamos fábriques, non patrones.
Pol fin de los engaños patronales, tol poder a les trabayadores.
ASTURIES NUN TA EN VENTA#LluchandoPolaSoberanía
Vémonos mañana con Asamblea trabajadores Gijón Fabril na manifestación “Gijón Fabril nun pieslla” xueves 4 de febreru
17:00 Gijón Fabril, Porceyo
19:00 Plaza L’Umedal, Xixón
20:00 Plaza l’ayuntamientu, Xixón
[eventu: https://www.facebook.com/events/1687252681524712/]
Espaciu La Llegra 