Cena-Alderique “Procesu soberanista nos Països Catalans” + eleiciones 27S

27S: eleiciones en Cataluña. Llevamos meses sintiendo falar d’ello nos medios, nes últimes selmanes con muncha intensidá, inclusu nel Día d’Asturies. El 8S unos y otros aprovecharon la xornada pa falar implicitamente d’ello, pero, sacante’l bombardéu mediáticu… ¿cómo nos afecta a les asturianes esti día históricu pa unos, apocalipticu pa otros? ¿Como se vive dende dientro?

P’aldericar sobre lo que pueda pasar en Cataluña y lo qu’esto pueda significar p’Asturies, entamamos esti domingu dende les 20:00 una cena-alderique na que vamos contar con militantes de la esquierda independentista catalana, nun formatu relaxáu nel qu’intercambiar paeceres mientres llenamos el banduyu, remoyamos el gargüelu y siguimos el recuentu de votos.

Por ciertu, la cena ye de traxe, vamos compartir ente toes la comida que traigamos de casa.

Vémonos esti domingu 27S a les 20:00 nel Llar La Llegra

https://www.facebook.com/events/401231890069377/

La Llucha Antifascista n’Ucrania. [Charra + proyeición]

El miércoles 23 de setiembre, a les 19:00 h, na Llegra vamos tener una charra, a cargu d’un compañeru que vien de participar na II Caravana Antifascista que recorrió Ucrania, vamos proyectar videos coles atrocidaes que fae la extrema derecha col preste del gobiernu y la comunidá internacional.

https://www.facebook.com/events/147905705554826/

PASUCÁIS 14-N ABSOLUCIÓN

PASUCAIS SOLIDARIU POLA ABSOLUCIÓN DE LOS PROCESAOS NA FUELGA XENERAL DEL 14P

Asturies en Pie entama una concentración pola absolución de los procesaos na fuelga xeneral del 14P, que va tener llugar el viniente sábadu 19 setiembre, a les 19:30 h., na plaza’l teatru Campoamor d’Uviéu.

El próximu 28 setiembre, van ser xulgaos 6 trabayadores por sofitar los piquetes informativos de la fuelga xeneral del 14-P (d’ente ellos, 4 militantes de la CSI y ún del FUSOA), con un pidimientu conxuntu de 12 años de prisión.

Demientres la fuelga xeneral del 14 payares de 2012, la UIP (los antidisturbios) cargaba ensin denguna xustificación sobre un piquete informativu de la CSI y la CXT ya invadíen la Casa Sindical de Xixón, de forma illegal dafechu, dexando a delles persones mancaes, que tuvieron de ser atendíes por xunidaes móviles del SAMU.

Resultáu: Cuatro persones deteníes y dos imputaes, les cuales enfréntense a penes que en conxunto, superen los 12 años de prisión. Sicasí, nin una sola de les denuncies interpuestes poles persones afrellaes pola policía, foi siquier almitía a trámite, magar que los partes médicos destacaben la gravedá de les mancadures que, en dalgún casu, precisaron d’intervención quirúrxica.
.
Nel conxuntu d’Asturies, tamos falando de decenes y decenes de persones encausaes, que podríen atropar un pidimientu fiscal de más de 300 años de prisión, que ponen en xuegu non solamente los derechos básicos que se defenden, sinón el mesmu derechu a la protesta, el derechu a la fuelga y el derechu a participar en piquetes informativos.

¡SAL A LA CAI!
¡NUN PODEMOS DIR A PRISIÓN POR LLUCHAR POLOS NUESOS DERECHOS!

Charra-alderique: Absolución pa los procesaos na fuelga xeneral del 14P

MARTES 15 SETIEMBRE. 19:30 h. ESPACIU LA LLEGRA. C/ POSTIGU BAXU 40. UVIÉU. ASTURIES.

El viniente martes 15 setiembre, a les 19:30 h., nos llocales de La Llegra (c/ Postigu baxu 40, d’Uviéu), los procesaos na fuelga xeneral del 14P van realizar una charra informativa na que van desplicar les razones poles qu’agora s’enfrenten a un pidimientu conxuntu de 12 años de prisión y la campaña de movilizaciones que s’atopa realizando Asturies en Pie pa desixir la so absolución y reivindicar los derechos de fuelga y participación nos piquetes informativos.
https://www.facebook.com/events/682332105237014/

CONCENTRACIÓN + DÍA 8 SETIEMBRE, UVIÉU: “Lluchando pola soberanía”

12:30 CONCENTRACIÓN “Lluchando pola soberanía”
14:00 XINTA POPULAR, XUEGOS TRADICIONALES, MÚSICA NA CAI… ¡Y MÁS!

¡Xúnite a un 8 Setiembre popular n’Uviéu!
———————————————————————–

-Frente a la parafernalia gubernamental, autocomplaciente y afitada en falsos rellatos como’l Cuadonguismu, vemos qu’otru 8 de Setiembre más faise imprescindible salir a la cai a reivindicar que nesta Asturies, poco o nada hai que cellebrar, y sí muncho que siguir construyendo a comuña, nesa pernecesaria visión alternativa d’Asturies cola que valtiar les problemátiques que mos afecten.

-L’Asturies d’anguaño ye la de la crisis permanente, con un texíu económicu en decadencia dende va décades pol desmantelamientu industrial, que deriva nun altu desemplegu y precariedá como constantes nel tarrén llaboral. ¡Futuru n’Asturies!

-L’avieyamientu demográficu y la perda de población, asina como’l desmantelamientu del mundu rural asturianu, ye otra problemática clave, y en rellación colo anterior. Reivindicamos un proyeutu de país qu’apurra un futuru dignu al so pueblu, tamién nel rural.

-Tampoco ye almisible’l papel sumisu y cómpliz del gobiernu asturianu pa coles imposiciones vinientes d’otres estructures al serviciu de les mesmes élites, como l’Estáu español,o la Xunión Europea, en cuestiones como les polítiques agroganaderes, industriales o pesqueres. Por Asturies como centru de decisión.

-Esa sumisión y complicidá dase tamién en favor del poder económicu y les sos empreses, cuando de pieslles d’instalaciones, despidos, empioramientu de les condiciones llaborales, o esplotación de los nuesos recursos naturales se trata. Polos drechos llaborales.

-Los servicios públicos calteníos pol sucursalista gobiernu asturianu, vienen sufriendo importantes recortes ya incluso privatizaciones, espeyao too ello por numberoses denuncies. Por unos servicios públicos y de calidá.

-Les polítiques sociales nun faen más que siguir afitando la desigualdá ente homes y muyeres, siendo éstes últimes víctimes de violencia machista, discriminación llaboral, etc, que conviértense en problemes sistémicos frutu del patriarcáu.

-Ye momentu tamién d’aparar d’una vegada les polítiques aculturizadores, que cunten cola so máxima espresión na marxinación y falta de drechos de los y les falantes d’asturianu y gallego-asturiano, pero tamién ye la hora d’unes polítiques culturales qu’apuesten polo propio. Por un tratu dignu a la nuesa cultura.

Puxamos, polo tanto, por superar un sistema capitalista que, sirviéndose les sos ferramientes estatales y supraestatales, niega al nuesu pueblu’l mandu de la economía, de los recursos naturales, de les polítiques sociales a desarrollar, de cómo rellacionanos con otros pueblos: en definitiva, niega la construcción d’un futuru dignu pa les clases populares de la nuesa nación.

Porque ye la hora de construyir una Asturies del pueblu, esti 8 Setiembre tornamos a salir a la cai, siguimos lluchando pola soberanía.
https://www.facebook.com/events/886942641389078/

https://www.facebook.com/events/886942641389078/permalink/890008044415871/?ref=1&action_history=null