Monthly Archives: Xunu 2015

Charra: Kurdistán ¿d’u vien? ¿Au va? Nueves perspeutives.

kurdistan
El vienres 26 de xunu a les 19.30h nel Llar La Llegra d’Uviéu cuntamos col historiador Tino Brugos pa falar del Kurdistán, un país a camín ente Turquía, Siria, Iraq, Armenia ya Irán y un pueblu en llucha pola so soberanía y llibertá plena.

Hai muncho que cuntar. Dende les últimes eleiciones turques, nes que’l movimientu kurdu illegalizáu participó nuna coalición d’izquierdes entrando nel parllamentu a la llucha heroica escontra l’estáu islámicu en Kobani, na frontera con Siria o’l papel destacáu de les muyeres nesti movimientu.

Nun podéis perdelo!
https://www.facebook.com/events/669614799806791/

Concentración escontra la Llei Mordaza

mordaza

Dientro de la campaña escontra la Llei Mordaza entamada por Asturies en Pie, dende l’Espaciu La Llegra convocamos una concentración esti xueves 25 de xunu a les 19:30 na Plaza La Escandalera d’Uviéu.

La campaña continúa’l vienres n’Avilés na Plaza’l Conceyu y con una Xornada de Llucha pal día 30 que va rematar con una manifestación que va salir de la Plaza L’Umedal de Xixón a les 19:30.

Escontra esti ataque a la llibertá d’espresión que namás que pretende meter mieu en cuerpu a les que lluchen pola Xusticia Social, tenemos que ser firmes y amosar la nuestra fuercia: NUN VAN SER QUIEN A CALLANOS.

Esti pueblu nun se rinde, #LluchandoPolaSoberanía, pola #XusticiaSocial

LLEI MORDAZA NON

https://www.facebook.com/events/419332114906331/

Folixa Solsticiu Branu

imprimir1.jpg

Colectivos del Antiguo organicen una folixa nel prau de La Casona La Regla pa celebrar el solsticiu de branu
Cuntacuentos, gynkana, xuegos tradicionales, pasucais y cena serán dalgunes de les actividaes que se van cellebrar dende les seis la tarde
_____________________

Colectivos sociales y vecindariu del barriu uveín del Antiguo van cellebrar xuntos esti martes 23 el solsticiu de branu. Dende les seis de la tarde’l prau asitiáu tres La Casona La Rega va acoyer delles actividaes pa tolos públicos ente les que s’alcuentren cuntacuentos pa la reciella, pasucais, feria de colectviso, gynkana, talleres, xuegos tradicionales y una merienda-cena con comida compartida ente toles persones que participen na folixa.

Dinamizar el barriu y entamar a facer actividaes a comuña ente dellos llocales y colectivos del Antiguo (Partycipa, L’Arcu La Vieya, Cambalache, Oviedo Redondo, Paraíso y La Llegra), son los dos oxetivos cimeros d’esta xornada. L’eventu lleva preparándose dende primeros de xunu al traviés d’asamblees abiertes a tol vecindariu que buscaben recuperar San Xuan nel Antiguo. Tres la decisión del Ayuntamientu de treslladar la foguera al barriu, cellébrase esti solsticiu de branu pa reivindicar tamién un modelu festivu popular, onde los vecinos y vecines seyan protagonistes activos nel diseñu y organización de les sos propies fiestes.

https://www.facebook.com/events/1683426735214400/

I Abiertu de Liriu del Solsticiu de Branu

Proyección de ‘Izan Pirata’, sobre les fiestes populares en Donosti

Al calor del movimientu nel Antiguo poles actividaes de San Xuan y posibles iniciatives festives y populares nel barriu, proyectamos el documental sobre Donostiako Piratak, el colectivu qu’organiza les fiestes populares en Donostia.

SIPNOSIS:
“Centrámonos nestos ideales: Les fiestes son del pueblu y han de ser participatives y pensaes pal pueblu, queremos fiestes euskaldunes, fiestes onde se respete la igualdá de xéneru y’l mediu ambiente. Creáu casi de la nada, nestos 10 años conseguimos construyir una alternativa y somos miles lxs piratas que nos reunimos cada año, pa demostrar que too ye posible.

El movimientu Donostiako Piratak creamoslu unos mozos y moces que tábemos fartos cola Semana Grande qu’organizaba l’Ayuntamientu de San Sebastian. Decidimos axuntar fuerces y ponenos a trabayar. Asina, durante años fuimos organizando una alternativa al programa oficial, y inclusu llegó’l día nel que l’Ayuntamientu reconoz la nuestra llabor”.

Ruta pelos escenarios clave del 25 Mayu de 1808

Esti vienres 5 de Xunu dende l’ Espaciu La Llegra siguimos afondando nos fechos del 25 de Mayu de 1808, esta vegada dende’l repasu de los fechos hestóricos más importantes.

Pa ello vamos cuntar col hestoriador Faustino Zapico, que va desplicar estos sucesos al traviés del percorríu de los llugares más destacaos n’Uviéu, siendo polo tanto una bona ocasión pa siguir deprendiendo alrodiu d’unos fechos hestóricos perimportantes p’Asturies.

El llugar d’aniciu va ser na fonte asitiada na Plaza La Catedral, a les 19:00 ¡Asperámosvos!

https://www.facebook.com/events/592158640887368/

This slideshow requires JavaScript.

Asamblea abierta foguera San Xuan del Antiguo

Vecines, vecinos y colectivos del barriu queremos recuperar la foguera de San Xuan del Antiguo.

Pa ello convocamos una asamblea abierta esti miércoles a les 20.00 na Plaza’l Paragües na que pensar ente toes y toos cómo facelo.

Porque les fiestes son del pueblu, porque naguamos por un modelu festivu nel que la ciudadanía seya la protagonista activa altraviés de la participación, l’autoxestión y l’autoorganización.

Nun queremos ser namás espectadores. ¡Por unes fiestes pa tol mundu organizaes ente tol mundu!
https://www.facebook.com/events/880670645313289/

foguera