Monthly Archives: Ochobre 2014

Bloque soberanista na movilización escontra los Premios Principiegos

10606116_784775801584616_607794672150238818_nOtru añu más lleguen los Premios Príncipe, y con ellos el circu esistente al so alredor: descomanaos dispositivos de seguridá, cobertories mediátiques perimportantes, y otres munches aiciones empobinaes, ante too, a garantizar un eventu cuyu principal enfotu ye llavar la cara d’una monarquía española cada vegada más debilitada y con menos sofitos.

Nun se trata namái d’una reivindicación abstracta escontra estos premios y el so envís, o escontra la monarquía y lo implícito nella, sinon que consideramos perimportante asitialo nun marcu específicu asturianu que ye clave pa la propia monarquía española, al atopanos dende va sieglos somorguiaos a la denomación institucional de “Principado”. Ésta nun ye otra qu’una institución arcaica y feudal creada en 1388 como consecuencia de les derrotes militares tres delles rebeliones asturianes escontra Castiella, polo que frente a la visión “honorífica” d’esta institución que mos quieren treslladar dende’l poder, alcontramos la realidá: una figura institucional que simboliza la sumisión d’Asturies, y que ye imprescindible pa la propia esistencia del modelu monárquicu.

Queremos amás venceyar esta cuestión a un refugu xeneral escontra cualquier institución monárquica, al ser inevitablemente un marcu d’impunidá llegal y desigualdaes sociales qu’evidentemente nada tienen que ver colos valores republicanos. Amás, nel casu del Estáu español, la so escoyeta a déu pol dictador Francisco Franco fae de la monarquía ún de los símbolos cimeros del continuismu que supón el réxime del 78 respeuto al anterior, calteniendo nel poder a les mesmes élites económiques, polítiques y sociales.

Poro, dende la izquierda soberanista asturiana nun ye l’enfotu namái oponenos a estes cuestiones, sinon tamién facer ver la esistencia y necesidá d’otra forma de ver y faer Asturies, representada nuna República Asturiana. Porque hai alternativa a la sumisión política y económica total na que s’alcuentra Asturies; a l’aculturización que carecemos y que va implícita na propia naturaleza del proyeutu nacional español; y por supuestu, a la represión, les desigualdaes sociales, o la falta de trabayu y futuru dignu, que sufren les clases populares asturianes.

A fin de cuentes, vemos tanto los Premios Príncipe como la monarquía española y les sos instituciones impuestes n’Asturies, como un frente más nel que siguir treslladando la necesidá de soberanía, de poder popular, como ferramienta y camín pa tresformar el nuesu país, y al mesmu tiempu pa siguir texendo redes nun necesariu internacionalismu nel Estáu español que nun niegue’l calter nacional de los nuesos distintos pueblos, y dende la reconocencia y respetu a les especifidaes propies de caún permitan golpear escontra los enemigos comunes.

Los Premios Príncipe y el “Principado” son una humildación pal nuesu pueblu, una humildación impuesta y financiada con dineru públicu, cola que’l pueblu asturianu tien qu’acabar. Asina lo entendimos siempre dende la izquierda soberanista asturiana, como amuesen les movilizaciones pioneres nel nuesu país escontra los Premios Príncipe entamaes pol Ensame República Asturiana años atrás Por too ello, llamamos a la participación nel bloque soberanista que va conformase nes movilizaciones del día 24 d’ochobre, escontra la monarquía y pola República Asturiana.

Asturies nun s’hereda
República Asturiana
#LluchandoPolaSoberanía

10624960_784400038288859_5023495113264894662_n

1957846_784943191567877_7955138473369120155_ow1w2

w