Monthly Archives: Abril 2015

Charra: “Mirando pa Venezuela: Revolución, Poder Popular, Comunes y Democracia”

Charra a cargu de Pablo Pascual (Comité de Solidaridá con América Llatina – COSAL) na que podremos averanos al modelu de participación y democracia na República Bolivariana de Venezuela.

¿Revolución? ¿Poder popular? ¿El papel de les comunes? El ponente fadrá un repás pel modelu bolivarianu tres de la so estancia nel país nos últimos meses con documentación gráfica.

Una mirada dende Asturies a Venezuela reblagando penriba de los prexuicios y manipulaciones de les empreses de comunicación de mases.

Esti xueves 30 d’abril a les 19.30h nel Llar La Llegra (Cai El Postigu Baxu, 40) d’Uviéu.

¡Avérate!

Proyeición de”Bernabé”, primer llargumetraxe n’asturianu

bernabe.jpg

Esti xueves nel Llar La Llegra (Uviéu), vamos proyeutar “Bernabé”, l’aclamáu primer llargumetraxe del mozu direutor ribeseyanu Pablo Casanueva.

“Bernabé” ye’l primer trabayu de llarga duración rodáu dafechu n’asturianu y cunta la hestoria de Bernabé Ruenes Santoveña, un paisano de Llanes que mientres cumplía’l serviciu militar obligatoriu na década de los años 40 del s.XX, escapa pal monte fuxendo d’una llarga pena impuesta pola “xusticia militar”. Asina, coles sos aiciones pa sobrevivir, conviértese nuna lleenda nos conceyos del oriente d’Asturies pa toles xeneraciones venideres, protagonista d’innumerables hestories cuntaes poles nueses güeles na tradición oral viva del país.

Esti xueves de magar les 21:00, proyeición y darréu alderique col propiu Pablo Casanueva.

¡Nun falteis!
https://www.facebook.com/events/454345418057018/

#LluchandoPolaSoberanía: Conceyu abiertu pa conformar bloques soberanistes nes movilizaciones del mes de mayu

llplas

En mayu de 2014 entamó una dinámica nueva nel proceder de la izquierda soberanista asturiana: los bloques soberanistes nes movilizaciones del 1u de Mayu, del Día de les Lletres Asturianes, en movilizaciones de les Asamblées de Trabayadores en Llucha, 25 de mayu o na manifestación antitaurina de Xixón.

Estos bloques, onde participaben persones y organizaciones del ámbetu de la izquierda soberanista asturiana garraron la campaña #LluchandoPolaSoberanía como manera de visibilizar les reivindicaciones asturianes nestes manifestaciones, algamando una bona montonera de participantes y siendo de los cortexos más coloríos ya importantes neses movilizaciones.

Agora, a un mes vista del primeru de mayu, tornamos a convocar un conceyu abiertu a persones (militantes o non) de les estremaes sensibilidaes de la izquierda soberanista pa tornar a esta dinámica nos meses siguientes.

El conceyu va cellebráse’l xueves 16 d’abril nel Llar La Llegra d’Uviéu (Cai El Postigu Baxu, 40) a les 19.30h y ta ABIERTU a toles persones que quieran participar y pa decidir xuntes.

¡Puxa Asturies llibre!
¡Puxa’l Primeru de Mayu!
¡Oficialidá yá!

#LluchandoPolaSoberanía
https://www.facebook.com/events/1384592271865989/

Folixa Crowdfunding #AbriendoEspaciu

folixa.jpg

Yá son 17 los díes que’l Llar La Llegra ye una realidá. Llevamos más de dos selmanes dando espaciu a abondes actividaes y tenemos per delantre una axenda bien curiosa y ilusionante. De tolos futuros eventos, ún de los que más nos va prestar facer ye’l del próximu vienres 3: la folixa del crowdfunding.

Too esto nun sedría posible ensin les 138 persones que nos sofitastéis y los 4215 algamaos cola campaña del Verkami. Por eso agora tócanos cellebralo con vosotres y davos les recompenses pol vuestru sofitu. El vienres 3 d’abril dende’l mediodía va haber nel Llar La Llegra (cai El Postigu Baxu, 40):

13.30. Conciertu de Filanda
14.30. Espicha
16.00. Xuegos tradicionales (dexabolu, cuerda, liriu, bolu Cuideiru, llave)
18.00. Actuación musical por confirmar
19.30. Proyección video Crowdfunding + inauguración mural coles pallabres + entrega recompenses

Tais toes y toos convidaos! Y si nun vos vais poder averar pel Llar La Llegra el vienres, podéis facelo cualquier otru día que tengamos actividá, cuando tea’l llocal abiertu o escribinos pa quedar.

Munches gracies por abrir espaciu con nós! A partir d’agora podéis siguir tola información del Llar La Llegra en facebook, twitter y pasándovos pel númberu 40 de la cai El Postigu Baxu.
https://www.facebook.com/events/668385463266166/