Esti sábadu 24 de Mayu a les 12:30 n’Uviéu, tres entamar 3 bloques xunitarios en delles movilizaciones sociales nesti mesmu mes de Mayu, la izquierda soberanista asturiana sal otra vegada a la cai de forma conxunta.
Facémoslo p’alcordanos d’una fecha hestórica pal nuesu pueblu como ye la del llevantamientu popular del 25 de Mayu de 1808, tres el que la Xunta Xeneral declarose soberana.
Creemos que la falta de soberanía y de conocencia del potencial d’esti pueblu son delles de les razones que nos caltienen anguañu paralizaes y contra les cuerdes, mientres el poder políticu y económicu sigue esfarrapando’l país.
Por eso una montonera persones a título individual, convocamos esta concentración y salimos a la cai esti sábadu 24 de Mayu.
Esti mes de mayu salimos a la cai reivindicando la llucha de la clase obrera (1/5 Xixón), glayamos pola oficialidá de la nuesa llingua (9/5 Uviéu), avisamos de que Asturies nun pieslla (17/5 Uviéu) y reivindicamos los espacios soberanos contruyíos pol poder popular como’l Csoa La Madreña (21/5 Uviéu)
Esti sábadu 24 vamos xuntar toles voces nuna pa dicir al altu la lleva que siguimos equí,#LluchandoPolaSoberanía, qu’el pueblu asturianu nun se rinde, siguimos en pie! #AsturiesEnxamásVencida
